O Plan Sinerxía é unha iniciativa da Consellería de Educación, Ciencia, Universidades e Formación Profesional, en colaboración con diferentes organismos, destinada a promover a innovación educativa e a coordinación e desenvolvemento integrado de actuacións nos centros docentes non universitarios sostidos con fondos públicos dependentes desta Consellería.
 
O programa abarca seis ámbitos de actuación vencellados aos mencionados obxectivos:

• Educación artística e patrimonial
• Educación para a igualdade e a cidadanía 
• Educación intercultural e internacionalización
• Educación en lingua e comunicación
• Educación en hábitos de vida saudables
• Educación para a sostibilidade

 
Neste marco, o plan impulsa o deseño e desenvolvemento de proxectos interdisciplinarios que, desde a autonomía dos centros e mediante o emprego de metodoloxías activas, favorezan a aprendizaxe competencial e a participación activa do alumnado.
 
Estas iniciativas pretenden integrar de maneira transversal as competencias clave e os elementos curriculares vinculados, entre outros aspectos, ao desenvolvemento sostible, á educación para a saúde, á igualdade entre mulleres e homes, á promoción da nosa cultura, ao tempo que ofrecen respostas educativas aos desafíos sociais, económicos e ambientais da sociedade actual e futura. Así mesmo, os proxectos poderán xerar experiencias, modelos de traballo e boas prácticas que contribúan á mellora do labor docente e que poidan ser compartidos e aproveitados por outros centros e pola comunidade educativa galega no seu conxunto.
Neste curso escolar 2026/27 ofrécense 25 programas educativos, que poden ser consultados na web do Plan Sinerxía (véx. Programas)
 

Prazo de solicitude: ata o 13 de novembro de 2026.