Que necesitas?
Os distintos fondos
Fondos Europeos de Investimento: construíndo o futuro da UE
Máis da metade dos fondos da Unión Europea canalízanse a través dos Fondos Estruturais e de Investimento Europeos, que teñen como obxectivo reducir as desigualdades rexionais, fomentar o crecemento económico e mellorar a calidade de vida dos cidadáns. Estes fondos son xestionados conxuntamente pola Comisión Europea e os Estados membros.
Os principais fondos europeos que financian estas políticas son os seguintes:
- Fondo Europeo de Desenvolvemento Rexional (FEDER)
Aspira a reforzar a cohesión económica, territorial e social a través do investimento en sectores que fomentan o crecemento, melloran a competitividade e promoven a creación de emprego. Tamén financia proxectos de cooperación transfronteiriza. Os seus investimentos concéntranse en áreas prioritarias como:- Innovación e investigación
- Dixitalización
- Apoio ás pequenas e medianas empresas (pemes)
- Economía de baixas emisións de carbono
- Mobilidade urbana sustentable
- Fondo Social Europeo (FSE+)
Investe nas persoas, mellorando o acceso ao emprego, a inclusión social, a educación e a capacitación. Presta especial atención aos colectivos vulnerables e á redución da pobreza e a exclusión social. - Fondo de Cohesión
Dirixido aos Estados membros cun PIB inferior ao 90 % da media da UE, este fondo promove o crecemento sostible e a conectividade mediante investimentos en infraestruturas verdes e redes transeuropeas. España non é beneficiaria neste período, pero si outros países da UE central e oriental. - Fondo de Transición Xusta (FTX)
Ten como obxectivo apoiar aos territorios máis afectados pola transición cara a unha economía climáticamente neutra. Financia proxectos que promovan a reconversión industrial, a reactivación do emprego e a diversificación económica en zonas dependentes de actividades con alto impacto ambiental. - Fondo Europeo Agrícola de Desenvolvemento Rural (FEADER) - PEPAC
Durante o período 2023-2027, o FEADER intégrase no Plan Estratéxico da PAC (PEPAC). Este fondo contribúe ao desenvolvemento sostible das zonas rurais, á protección do medio ambiente, á loita contra o cambio climático e á mellora da competitividade do sector agrario e forestal, favorecendo a fixación de poboación no rural. - Fondo Europeo Marítimo, da Pesca e da Acuicultura (FEMPA)
É o fondo que apoia a política pesqueira e marítima da UE. O FEMPA promove a pesca e a acuicultura sustentables, o desenvolvemento das comunidades costeiras, a protección da biodiversidade mariña e a transición ecolóxica do sector.
Todos estes fondos están orientados a construír unha economía europea máis competitiva, verde, inclusiva e dixital, centrada nas persoas e nos territorios. A súa acción concéntrase principalmente en cinco ámbitos estratéxicos:
- Investigación e innovación
- Tecnoloxías dixitais
- Economía hipocarbónica
- Xestión sustentable dos recursos naturais
- Apoio ás pequenas empresas
Os tres primeiros fondos –FEDER, FSE+ e Fondo de Cohesión– son os instrumentos clave da política de cohesión da Unión Europea, contribuíndo decisivamente á solidariedade entre rexións e ao desenvolvemento equilibrado do territorio europeo.